我被逼買樓 叫我租青年宿舍唔該貼地少少….

張日朗

張日朗

大學畢業數年,從事金融業,喜歡研究社會經濟現象

得閒無聊係youtube睇片,睇番一段4 年前甚受歡迎的片。條片相信大家都仍有印象,就係有人改篇網絡潮文《女朋友帶你返屋企食飯》,拍成套《公屋。居屋。私樓》,還找來拍電視劇的盧宛茵做女友阿媽這個主要角色。

套片就講女友帶男友首次回家吃飯,盧宛茵這個伯母就旁敲側擊,打探男仔住係邊,一聽到係住公屋,就面色變黑,連枱面碗雞都即刻收埋,並扮唔舒服費事再同個男仔同枱食飯,跟住無耐女朋友就跟男仔分埋手;條片跳去另一段,今次女友帶回來個男友,在伯母打聽下,話自己住居屋,伯母面色就幾好,並挾個雞胸給個女啲男友;到第三段則是女友帶個男友首次回來食飯,卻大遲到,伯母自然面燶,但當聽到個男仔解釋話自己因剛搬了去私人屋苑,伯母就立即變臉改為笑口噬噬,還要挾個雞脾俾個男仔,並催他與個女快些結婚。

男主角住公屋,伯母就阻止他夾餸。

這段片係2014年3月上載,事隔近4年,情況有變,而係愈變愈差。等、等、等,以為等到樓價跌,買番間納米樓結吓婚。點知樓價4年再升3成以上。我嗰個伯母,我可以唔見就唔見啦。

最近見新世界推個「新世代首置計劃」,申請都幾熱烈,雖然唔似林順潮眼科公司咁爆錶,都有大量超額認購,睇番啲數,4成申請人現在住緊係公屋,好多係聯名申請,相信係買來結婚一齊供樓。

我身邊大把呢種人,住公屋等緊買樓結婚。就算兩夫妻肯一齊供,都要有首期,若果畢業幾年,搵萬零二萬蚊一個月,忍得好辛苦唔搭半夜紅眼廉航一年去十幾次日本、韓國、台灣,點慳都只係儲到幾十萬,買居屋都怕唔夠。現在發展商個首置,最低首期只需約40萬,就唔係無得諗。係香港這個時勢,唔係好有需要,邊個想買樓做樓奴,要結婚要見外母要食雞脾,唯有焗住上。

男主角住私樓,外母就主動夾雞脾給他。

上網睇見到新鴻基接班人唔記得叫乜名,總之係富三代啲friend,話要幫年輕人,唔係幫佢地買樓,話發展商搞首置幫助有限,亦會惹來非議,反而如果透過非牟利機構,以出租形式進行更實際。

我就覺得有少少堅離地囉,租樓同買樓根本兩回事,唔好人地飲緊紅酒你話飲清酒啦。其實租樓就無謂,不如跟老豆阿媽逼公屋,更容易儲到錢買樓。

新世界現在打骰的鄭志剛,都係富三代,就知道年輕人真係有買樓需要,最大問題係未來供得起都唔夠首期。我就覺得佢地個計劃雖然好,但數量唔夠多,推得數量多啲就更好。

張日朗
** 博客文章文責自負,不代表本公司立場 **

Leave a Reply

Top