瑧尚清袋 新世界接班人見真章

湯錦標

湯錦標

《英文虎報》TheStandard 總編輯

美國聯儲局剛宣布今年內暫停加息,周末隨即有3個住宅樓盤率先開售,其中又以新世界發展(017)旗下的土瓜灣新盤瑧尚最受觸目,一日內沽清全數294個單位,成為2017年底以來首個一Q清袋的新盤。

瑧尚成為本港近年罕見「一Q清袋」新盤。

這兩天有不少傳媒以「曬冷」形容新世界今次開售瑧尚的手法。周末和一班金融界朋友嘆咖啡,瑧尚熱銷成為熱門話題,我就話「曬冷」好似有「一鋪賭輸贏」之感。我覺得「曬冷」這個詞不太貼切,新世界眼見市場反應熱烈,售樓處長龍打哂蛇餅,加上該盤貼市定價,貨源不到300伙,選擇第一時間全數出售,亦合情理,無所謂「曬冷」,但就省靚了新世界個招牌。

瑧尚並非大型新盤,但銷情仍大收旺場,既關乎樓市大局,亦和發展商實力有關。從宏觀大局睇,香港住宅市場經歷一輪急速調整,一手及二手樓樓價近日反彈勢頭明顯,加上聯儲局不停放鴿,新盤大小陽春愈爆愈勁,再一次造就排隊搶新盤狂潮。周末除了瑧尚,同時亦有油塘曦臺及將軍澳樓盤開售,雖然遠不及瑧尚銷情,但仍算賣得不錯。

瑧尚並非大型新盤,但銷情仍大收旺場。

但瑧尚今次一Q清袋,亦和發展商實力有關,值得有留意新世界股票的投資者的關注。

據悉,瑧尚買家中8成為年輕用家,2成為投資客。年輕用家主導,某程度反映新樓盤形象同年輕一代啱key。近年新世界由新一代掌舵,第三代鄭志剛開始上位,他策劃的Artisanal Movement,為樓盤注入藝術元素, 拉升檔次,提升品質,品牌效應漸現,獲市場受落。如果只是叫好呃吓likes未見真章,到賣樓真金白銀入場就無得呃啦。

飲咖啡又講到最近接連有超級地產富豪退休,市場更加關注二三代接班人,如何為家族生意打開新局面,搞得掂,隻股都睇高一線。好似新世界,鄭志剛兄弟妹漸露頭角,近日集團新項目逐漸落成,尖沙嘴Victoria Dockside商業組合、Rosewood 瑰麗酒店等搞得有聲有色,漸受注目。

Victoria Dockside。(資料圖片)

如何搞好公司業績,也有學問。有地產界人士話,近年上市公司更改會計制度,令到部份地產公司的業績受到衝擊,而新世界截至去年底上半年度業績,卻沒有受新準則影響,期內收入還大升76.4%,至492.67億元,股東應佔溢利也微升0.1%,至112.84億元。新世界業績優於同行,原因在於該公司趁去年業績好時提早採用了新準則,不單減低對去年純利的影響,又留下了部分收入在今年度入帳,所以連續兩年都取得佳績,善用新準則整靚盤數。

今時今日做生意唔單止要比新意念、比經營手法,亦要比公司業績,新世界率先推blockchain 賣樓,食住proptech大潮,有機會改變地產行業生態。新世界接班人這方面佔了不少先機,反過來其他集團的接班人,可能也會急起追落後。

湯錦標
** 博客文章文責自負,不代表本公司立場 **

Leave a Reply

Top