與年青人研究(4):五大撃走憂鬱好方法

陳慧蕊

陳慧蕊

由律師搖身搞社企,Elite Thai Boxing & Fitness Ltd,學習營造精英解決社會問題,令自己及大家都更年輕、健康、快樂!

與年青人研究(4):五大撃走憂鬱好方法

與年青人分享,很明白佢地面對生活的各種壓力,及對人生意義的無奈。就根據我個人經歷、體會,同佢地一起硏究,如何有效多角度出招,用五招全方位撃走憂鬱!

1. 尋求信仰或正能量朋友的幫助:

如果你身邊有正能量朋友,佢又願意聽你傾訴,就要捉住佢,睇睇佢有冇好意見。有些情況淨係同佢傾訴一下都會舒服一點。但呢類朋友可遇不可求,就算有亦可能唔好意思麻煩人家。有些事情又不方便講;有時仲怕自己負面情緒太勁,連朋友都累埋。

如果你有信仰,又有一班有同樣信念的信徒,通常都會有幫助。例如基督教,教會會教你凡事相信,凡事都有盼望,有一愛你的神在看顧帶領你,常常祝福你。

我就去過位於灣仔最高大厦中環廣場頂樓的 Sky City Church。個教會好適合年青人參加,啲敬拜歌係用 Hillsong 或型仔牧師 Pastor Wayne 自己作的歌曲,好聽又可以學英文。教會義工 Mabel 廚藝有酒店級水平;平時完左聚會大家可以留下來食佢弄的美食,過時過節仲有特製應節甜點,同酒店自助餐有得 fight。仲有充滿愛心的教會姊姊哥哥照顧年青人,值得試試,點都會增強抗逆能力。

Sky City Church 時有cutie 美食招待年青人

但如果你唔相信有神,或者唔同意教會的説法、覺得風格唔適合你等,又沒有正能量朋友幫助,咁就要靠自己。餘下四種方法,都係可以自救的妙法:

二: 理性自我分析

試圖客觀分析一下有乜野令到自己唔開心。通常係遇到唔如意的事,同別人比較,覺得自己好慘。其實在差不多所有情況下,這世上一定有比你更幸福、更幸運的人,亦一定有比你更慘、更可憐的人。如果你要比較,就要提醒自己要客觀、要平衡:每次你跟一個比自己更好的人比較,就必定亦要找另一個比自己更慘的人比較。就算要與某人比較,也要客觀持平全面點,你總有比別人好或強的地方吧!

所以基督教有教人要懂得感恩,佛教有教人要懂得知足無求。如果你做比較會令你更有推動力,改善自己,這是好的;但如果 over 左,比較令你沮喪、甚至憂鬱,咁你就要自我調節一下,再客觀分析一些感恩的事情,令自己可以正面向前走。

我認識一名年青人,又靚仔又醒目,好討好女孩子,搵女朋友輕而易舉;但時常比較有錢仔,覺得自己搵錢小唔開心。我覺得佢努力賺錢係好事,但如果佢睇唔到自己有好多有錢人都冇的東西,同埋珍惜感恩有這些,就好可惜:包括錢都買唔到的青春、健康、活力、真愛、人緣等。

三. 定短期目標令自己有成就感:

年青人希望事業有成、有錢有樓、有妻兒女,是很好的,亦能推動年青人努力向上。但往往這些目標需要時間努力,亦要睇際遇。在未達標之前,如何鼓勵自己繼續努力堅持,而且心情暢快呢?

我自己都經歷過前滯不前、不停兜圈的無奈。除左訂一些大目標,我會嘗試訂一些較小或短期的目標,讓自己比較容易達到,安慰及鼓勵一下自己。由一個短期目標前進到另一個長遠目標,有不斷前進的推動力,就比較容易有正面情緒。

如何制訂短期目標呢?通常可以由自己的興趣或喜好開始,如覺得打鼓好型,就去上幾堂學到會為自己喜歡的歌打鼓伴奏,再繼續下去,學到自己可以夾 band 打鼓;一步一步訂小目標,令自己不斷有小成就,心情會變得越來越有盼望,及滿足感。

短期目標可以好簡單,找些小趣味來 occupy your mind。我在2003年沙士期間跟很多香港人一樣,情緒很低落,又唔敢出街,在家又悶。於是買個大型 puzzle 在家砌。當時我不會畫畫,但又喜歡睇畫,於是揀幅名畫自己砌,一邊砌一邊好欣賞幅畫,亦留意到名畫的顏色、構圖、細節,對名畫欣賞程度就提升左。完成第一幅名畫 puzzle 很有滿足感,好似幅畫自己有份畫的一樣。於是便不停砌;在沙士期間總共砌左四、五幅名畫 puzzle。之後對畫畫感到很有興趣,就大膽嘗試,結果畫左幾隻瓷畫及幾幅油畫,自己及朋友都很喜歡。

把維港海旁美景畫成油畫

短期目標亦可包括幫助別人;所謂助人為快樂之本,一點都不誇。當你能夠幫助到別人,佢嘅快樂好容易感染到你都快樂起來;而且你會覺得自己更有價值,生存更有意義。尤其是對自己喜歡的人,能夠幫助到他特別暢快。多留意身邊家人及朋友有什麼小事你可以幫幫忙;再有 capacity 就去睇睇社區甚至其他地區的人有什麼事你可以幫得上忙。當你留意到別人需要幫忙的地方,好可能令你體驗到自己的難處根本不算太艱難呢。

四. 尋找優質生活環境

香港這城市地小人多,平常生活都好易有壓迫感。但其實香港很多地方都好美麗,只要多留意,尋找一下,在繁忙的都市中也不乏有令人心曠神怡的好去處!有陽光時可在太陽下散步甚至跑步,下雨時可在商場內欣賞外面下雨的景色,在非繁忙時段可坐巴士或電車欣賞香港街頭景色,黃昏時坐渡輪過維港好令人心醉。晚上從中環行人電梯一路往上搭,又可欣賞香港夜景,又可隨時找到餐廳吃飯。

坊間亦有組織安排大家一起去玩。我就試過免費、網上召集大家一起去跑步的 Harbour Runner: 由一群有心的年輕人組織,每次去一段風景又美又可以共跑的街跑,好玩亦可多認識香港道路美景。

香港有山有海有公園有花草,心情不好時最好跑進大自然懷抱,聽一下自己喜歡的歌曲,飲一杯自己喜愛的飲品,讓心情能快速地放鬆開朗些。例如,在迷人的維多利亞海旁散步、在熱鬧的太平山頂欣賞一下香港景色、走走空氣清新的郊野公園或在繁華鬧市中間的香港公園,躺在有海風的幼沙海灘上,都係唔使點花費就可享受的優質生活環境。

五. 保養加鍛練身體

身體健康與否對情緒有好大影響。多做帶氧運動能令身體自然地釋放安多酚,令心情更好。不但如此,合適的運動能舒展筋骨,增強平衡力、協調能力、肌肉力量等。能更有效控制自己身體活動,反應快及靈活,自然而然就會感覺更爽,心情就會更舒𣈱。加上好的運動能令人內外都更有活力、年輕化,感覺會更有希望及自信!

我的社企就體會到泰拳不但具備以上條件,學員還可用沙包鍛練將不快情緒健康地發洩出來。去年開始我們便用泰拳幫助精神康復者擊走憂鬱,已幫助超過六十名人士。今年繼續得到精神科醫生協助,實行推出特別班,以行為治療幫助憂鬱情緒者改善佢地身心健康。

Elite 社企用泰拳擊走憂鬱課程

食物亦很重要, you are what you eat。吃得太多及多肉都容易造成心情煩躁。健康的素食不但令皮膚更好,亦會改善情緒。但光是不吃肉唔會令你健康啲,只係環保啲;仲要硏究下點樣素食得有營養,食多啲 superfoods。

人生雖然有許多外在因素很難控制,但以上五大妙法,大部分都是在自己控制範圍之內;只要下定決心,將自己情緒及能量控制掌握起來,正能量多了,說不定天都會幫你!當然如果以上幾點你努力嘗試過但都唔成功,就請你唔好放棄,亦唔好拖延,盡快找個好的專業醫生幫你,唔好浪費自己青春的歲月!

陳慧蕊
** 博客文章文責自負,不代表本公司立場 **

Leave a Reply

Top